2000張相...

上星期終於攞到啲結婚相，總共有成二千多張，睇哂都要用成個鐘時間呀...
跟住就係諗吓點俾啲相人睇，頭痛 @_@

在此先同大家分享吓呢幾張相先啦!

在Jeffrey屋企....

Wedding Luncheon @ JW Marriott

Dinner Banquet @ Graces Garden (玉桃苑)

九州之旅

Honeymoon去咗九州...^0^

Day 1 香港 --> 福岡(博多、天神) [行吓食吓]

Day 2 福岡--> 湯布院 [出名溫泉區，睇紅葉，去金麟湖，住溫泉酒店，超正!]

Day 3 湯布院 --> 別府 [睇別府地獄] --> 福岡

Day 4 褔岡 --> 阿蘇火山 [非常近距離睇火山，好新鮮]

Day 5 福岡 --> 鹿兒島 [去櫻島，又睇火山]

Day 6 鹿兒島 --> 熊本--> 福岡

Day 7 福岡 --> 香港

7日都陽光普照，影咗500幾張相...post咗啲相後再同大家share。

新的一頁

我和謝菲的婚禮於11月10日完滿結束，之後就去咗honeymoon，返香港後第二日就要返工，所以一直都冇時間update個blog。直至今日請咗病假，趁有時間就update吓啦。

我們的婚禮，可以說非常順利，時間安排亦很好。
Honeymoon，天氣好，食好，住好...

總之所有嘢都好順利，跟住落嚟就要整理一下啲相，再約返啲朋友出嚟聚一聚喇。Are you ready?

DONE!

人生的大project，終於順利完成喇!

多謝大家~ ^0^ 睇住呢張相先喇，去完honeymoon後再同大家分享!

Mr. & Mrs. Chan, 11月3日, 晴

請雙方交換介指~~

我請在場各人見証，我陳謝菲願以你斯莉亞為我合法妻子....
我請在場各人見証，我斯莉亞願以你陳謝菲為我合法丈夫....

攪掂 ^0^

下星期繼續努力~~

Celia & Jeffrey

玉桃苑的backdrop要加$380整名，謝菲覺得自己整到，咁就買咗約$50的材料自己整，好彩都整得幾靚 ^0^

無題

在淩晨時份約3點...

謝菲: 「點解啲人註冊完咁快就走？」
我：「乜野咁快就走？」
謝菲: 「頭先唔係有人喺度註冊咩？」
我：「你發緊夢咋。」

我再望吓間房，乜佢真係見到有人咩？心寒...

第二日講返俾謝菲知，佢話唔記得尋晚講過呢啲嘢 @_@, 我諗佢太緊張喇。

Honeymoon行程, 終於攪掂喇!

一直計劃去的沖繩，因航機班次嘅不配合而告吹。
澳洲，已買了travel guide，又問了多間航空公司及旅行社，最後因冇哂機位而告吹。

最後，終於決定去九州，玩福岡、阿蘇火山、鹿兒島，感覺都幾新鮮。訂機票過程順利，又book到間好正嘅溫泉酒店 (http://www.yufuin-rokumyo.jp/)，今日仲攪哂所有手續，攞埋機票...總算完成咗一件事喇。

謝謝謝君

非常多謝創意無限的朋友仔，為我哋設計咗邀請朋友去註冊用的invitation card，而我哋開場用嗰段片，都係由佢操刀...唔該哂!

順帶一提，記得我哋嘅註冊日同攞酒日係分開兩日o架!

又買龍鳳鐲

美國減息，金價創新高。在這個時候，應該十個有九個都唔會去買金....但我哋就係嗰第十個 @_@...又一龍鳳鐲...唔係嫌錢腥...而係...要買囉!

回禮利是封

今日買咗啲回禮用的利是封，覺得好靚呀，好傳統。

越來越鐘意有個"囍"字嘅嘢...

冠南華租褂

今日同兩個媽咪去冠南華租褂，最後係一人一套，即合共租咗3套。

嗰度啲褂真係靚啲，但我最鐘意係對裙褂鞋，好似無喺第二度見個呢個款，襯牛仔褲都好靚。

婚假

今日第1日返新工，諗住結婚嗰陣仲係probation period，都預咗攞no pay leave。
但估唔到，我竟然一入職就eligible for攞婚假，仲有5日添，好開心呀!

A380

今天從家的窗口遠望，竟然見到A380飛過...

謝菲即刻去攞相機，但拍到的A380只不過好似粒米咁細 @_@

大塞車

八號風球，交通癱瘓。

從我家望出去就係咁嘅環境...

八號風球下的我

因為掛咗8號風球，下午唔使返工，可以返屋企...

「喂，你去咗邊呀?」
「屋企...樓下囉」
「嚇死我呀，我都返到屋企喇，你仲未返到?」
「嗯...因為我去咗惠康買嘢...好似啲師奶咁...條隊排成20個人呀...」

唔鐘意等嘅我，都願意去排20個人...點解一打風，我第一時間係諗起去惠康買嘢?仲係要買餸...

駕駛執照

今天在娘家執嘢的時候，搵到我的第一張駕駛執照，可駕駛單車、四輪單車及木頭車。呢張執照係我細個時爸爸整俾我的，感覺很有趣，亦好有紀念價值...其實覺得老豆好攪笑...唔知點解細個嗰陣係鬈頭髮@_@

到大個咗，除咗單車、四輪單車同木頭車之外，而家仲識揸私家車同電單車呢！

第2號籌，第1個揀

7月19日上午7時55分...謝菲在這刻已經採排過好多次...而我，都仲係慢吞吞咁行去斟水...

7月19日上午7時58分...謝氏夫婦仲同我msn話已經預備好login...

7月19日上午8時00分...我load到張form喎，以為得咗，仲msn謝菲話我ok咗...

7月19日上午8時01分(其實未到01分)...收到謝菲的msn話 "Done"...

咁就完成咗網上預約遞交結婚通知書的手續...我哋攞到第2號籌，而登記揀大會堂的行禮時間就係第1個...yeah...又完成一件事...即係11月3日行禮喇。

7月19日上午8時02分...謝氏夫婦話"都唔好玩嘅，收工!"

Sea View

我哋間屋望出去個view都幾好o架，話哂都有海景睇吖...

第一餐飯

7月20日，連我都正式搬入嚟住，即係話呢個家正式運作喇！

今晚就由我煮第一餐飯，有菜心、煎蛋同理蒸鯇魚腩，睇吓謝菲食得幾開心！

新居逸趣

之前訂落的傢俬都已經送到新居了，基本上已可以住人....只不過未將自己的衫褲鞋襪搬過來(女生較多嘢嘛...)，所以謝菲先行入住，做獨居男人。

在set up新居的過程，有些小事要與大家分享：

1) 所謂高床軟枕至瞓得舒服，我哋做到喇，本身買床的時候已選擇較高身的，再加上特高的床褥，整張床的高度過了我的腰，以我這樣的身高在上床時，都要跳一跳起先上到，基本上個睡房可以成為跳高的訓練場地 @_@

2) 之前我的idea...已成泡影...bar枱，紅酒櫃...通通只可以留在腦中...但都買咗對紅酒杯，以填補心靈上的失落感；


3) 買咗好多家品，最喜歡的係塊 '針'板...由竹樹製成，有陣自然香味，個pattern又好鬼靚，鐘意到暈；


4) 每晚夜返屋企時，樓下果欄就開始繁忙，好多貨車上貨落貨...會聞到陣陣果香...仲會見到好多筋肉人...啲落貨工人真係好健碩o架，一舊舊肌肉，雖然唔係後生仔，仲有好多係上咗年紀添...行過到會忍唔住望兩眼。

去年的今天

去年的今天，我與所有家人到迪士尼好萊塢酒店食buffet。
去年的今天，陳謝菲就向我的家人提出我們的婚事。
去年的今天，我哋的籌備婚禮project正式kick-off。

即是說，我們的婚禮已籌備了整整一年了!還有約4個月時間就到大婚日子喇!

攞咗鎖匙喇

昨日一早去咗東華三院物業科簽租約，之後就去朋友仔屋企搬傢俱，再去到新樓攞鎖匙。但管理處話寫字樓好遲先通知有人攞鎖匙，所以啱啱先安排到清潔工人做清潔...咁我哋就放低傢俱後就走了。

都好，本來諗住自己做清潔，而家就慳返。

晚上再去，啲洗手盤、廁所及窗等等我認為好難洗的地方都清潔得好乾淨，非常之開心...之後就去咗買一些基本潔具，放低之後就走...

啲傢俬要下個星期先送貨，所以要正式搬的話，都要16號嗰個星期先得lu..

順帶一講，在客廳的冷氣係上一手留低o架，原本只係包房的兩部air con咋，賺咗一部好開心 ^0^

收到結婚相簿喇

結婚相的final product終於送到喇，成個packing好grand，有個喼裝住哂啲嘢。至於本相簿，個水晶封面真係好靚，但美中不足就係封面張相就淡色咗啲，仲有內頁其中一張相好似cut咗少少，細張咗...不過整體嚟講都滿意的。

呢兩張相就係封面及封底喇~~

七一大血併

星期三就可以攞新屋鎖匙了！
今日上咗去度位，之後就大出血喇...買咗電視、床、床褥、衣櫃、飯枱連櫈、梳化共6個items。
電視、床褥同梳化就比預期想買的有出入，分別最後都係買咗啲質素好少少的，所以就駛多咗少少咁啦。
明天會再繼續去IKEA睇吓...

感動 ^o^

自從朋友仔知道我就搬的消息後，我感受到他們的熱心，真係好多謝大家...

T&P: 多謝你哋啲傢俱呀，我哋又可以買少幾樣嘢lu，慳返啲錢用嚟投資落我個idea到!

J&K: 多謝借個位嚟擺嘢，如果唔係可能要幫襯喬寶寶喇!

M&PL: 多謝你咁認真咁話要幫我搬屋，不過我諗我哋都攪得掂o架喇!

AY: 多謝你問我要乜嘢結婚禮物...唔似你囉...所以好感動! 你嚟飲就得o架喇!

JI: 多謝你突然攞出嚟嘅筷子套裝禮盒，好surprise呀!

EY: 多謝你主動提出可以攞平傢俬的安排，等我攞到鎖匙睇吓先再決定啦!

RR: 多謝你問我有冇列張清單，話要送嘢俾我...但係呢，我冇清單呀，所以唔使送lu!

7月入伙--東寶閣

呢排屋企人都成日問我搵屋搵成點...無非都係想睇吓幾時動工裝修啫...

我哋最終都應該落實租東華三院的物業，而家已經留咗位，租務處話因為要翻新過同埋要搭棚換水渠，所以要等到7月先可以攞鎖匙。

雖然位置一般，但勝在平租同埋交通方便 ，管理都好好，又唔使俾佣金，又唔驚業主麻煩，個view都ok，望到西隧入口，都算係海景啦。

呢排都成日行傢俬舖，心目中都有啲idea要買乜，而我personally就要用一個角落整啲特別嘢，至於係乜，遲吓再講，因為暫時都搵唔到合心水的傢具for我嘅idea。

好睇過溏心風暴的租樓故事

有時一件事未到完結，都會有出人意表的結局......
話說，星期五晚約咗個地產經紀，我哋帶哂文件、支票諗住簽約，因為之前經紀話everthing alright，點知去到，原來連個租金都未係100% confirm，後來講掂喇，又到個免租期問題，因為業主未裝air con，所以又未交得鎖匙，但我哋都簽咗臨時合約，而業主一直都唔agree個免租期，所以佢冇簽，但就agree星期日前裝好air con...
到咗今日星期日，個air con ok咗，我哋都ok，咁就同業主在地產鋪度簽約...合約已寫好哂，免租期我哋肯讓步，因為經紀會再按日數再減我哋佣...
睇緊合約之際，業主突然話要寫明唔包屋內電器維修，嘩，新買的電器有保養，佢連保養証都唔肯交低，仲話因為唔想煩，如果真係有壞，等佢得閒先搵人整...就係到咗最後呢一步，火到嚟，我突然好唔想租層樓，個業主好Q煩，咁就即刻起身攞返啲ID copy，謝菲仲撕爛哂啲合約，我話你哋根本就浪費緊我哋啲時間，做嘢唔係咁o架，好inefficient...最後拎袋走人。個經紀聲都唔敢聲...呆咗...眼白白睇住埋門一腳都撻Q...我都幫佢唔到。

終於改到滿意喇(今次先真)

3月尾講過話已經confirm咗啲婚紗相，但睇睇吓又有嘢要改....改呀改呀....改咗10次有多，今次真係confirm咗喇，應該6月尾會寄到返嚟o架喇~~

徵求家電用品

日前油麻地個地產經紀打電話嚟，話之前我哋睇嗰個單位，而家業主願意安裝冷氣，仲肯減租。另外，樓上本來有個cage的單位，而家又拆咗個cage，又油過啲牆...所以今日又去咗嗰度睇。
睇完後，由於我哋'r'到個經紀減佣金，而個租金又在預算之內，仲有冷氣安裝，所以就target新裝修但貴少少嗰個單位，因為感覺舒服啲......而家就等傾埋個免租期，如果所有嘢都ok的話，就真係會搬喇...
由於第一次置家，好多嘢都要添置，所以現徵求被遺棄家電用品，如雪櫃、微波爐、甚至杯杯碟碟、枱枱凳凳，我哋都願意收留o架~~

嫁妝

今天媽媽買了龍鳳手鐲同頸鍊俾我作為嫁妝...但同一時間，接到銀行的電話問我媽媽係咪用張附屬卡買咗啲好大銀碼的東西...哈，咁係咪即係我買俾自己呢!?

搵樓...要繼續喇

上星期睇中咗油麻地嗰個單位，應該告吹喇，因為個價錢唔啱，見完業主後即興趣大減，因為就算啱，我哋預計到個業主都係啲比較多意見的人，又堅持唔裝冷氣，又話呢樣唔得嗰樣唔得，所以呢，佢揀租客之餘我哋都揀業主...而家可能轉戰樓上嗰個單位啦...
另一方面，住在附近的姊妹帶我們去了油麻地另一個地方睇，嗰度係東業三院管理，又平租，最緊要係免佣金，但就要排隊囉，所以明天會打電話去租務處問問有關細節。
而家我哋轉戰咗油尖旺一帶的樓盤，因為真係唔係我想像中咁差呢!

Wedding Luncheon@JW Marriott

原本計劃for朋友仔嗰場banquet，已經由cocktail改為lunch buffet喇!
原因係我哋想朋友仔食得好啲，又想多啲時間同朋友仔影吓相，lunch buffer又好似正式啲，因為如果upgrade cocktail個menu，價錢都同buffet差唔係好多，還掂都係咪改囉，又唔使另外安排兄弟姊妹團的lunch，一舉幾得....YEAH!

過大禮

擇咗日喇，已定於9月29日...
新郎新娘好似可以唔使在場...所以我哋會去街...yeah^o^

又搵樓

上星期日去咗旺角、油麻地一帶睇樓，一路都冇諗過呢區，因為覺得烏煙瘴氣，人又多，不過謝菲細妹以前住過呢附近，話有啲都ok，所以都去睇睇。
睇咗5個單位，有3個真係十分唔掂，好似會有個消防喉轆喺你屋企，又或者前身係一間office，仲要有個荒廢咗嘅冷氣又唔拆得，同個睇相佬做鄰居....非常趣緻....
最後兩個入選單位，一個就out buget，就算講都唔會平得好多，另一個呢，我哋今日再去睇多一次，夜晚望出街又有另一番風味，感覺幾好，最緊要係全新裝修....佢樓上都仲有一個單位出租，但唔知點解有個籠裝咗喺窗出面，古怪....但就平啲囉。
呢個星期日會約埋個業主，睇吓佢可唔可以offer到我哋心目中的價錢，如果ok，好快就搬喇!

斯莉亞小妹妹

呢個就係斯小妹，原來佢細個冇乜獨照之餘，仲冇乜影相，好難先搵到呢幾張咋...不過佢都唔係咁鐘意影相，呢種性格係天生嘅，低調嘛....

你睇細個時個Gasby頭幾型~~大個啲就bob頭~~yeah!

睇婚紗晚裝記(Part 4)

今日終於confirm咗Classic喇~~
其實我就好鐘意件婚紗，但晚裝就仲係掛住Peony嗰件囉。
而家就仲諗緊件旗袍點，一係喺Classis租埋，一係就喺Chinoiserie造啦...
Classic都有得造，但就只係造租，價錢同我Chinoiserie造一件差唔多，咁梗係自己要返啦。

呢條就係我揀咗嗰件婚紗喇....雖然睇都唔係好清楚，都睇住先啦! 個頭紗長到落地o架，仲有花邊，好正!

至於Chinoiserie的旗袍，可以去呢度睇吓....www.chinoiserie.com.hk

搵樓

關於婚禮的大項目都已經攪得七七八八，跟住落嚟係搵樓...
計劃在農曆七月前搬好，其實到而家想搵邊區都未有最後答案，大機會啲就係沙田同美孚，其次就青衣。
呢兩日都有去問吓啲地產，竟然冇樓盤睇，話呢排租客多過租盤，就算有的都唔啱我哋要求喎...點解點解，想租樓都咁難?不過或者我哋話6月先起租啦，所以都唔使咁急住，或者下個月啦，可能會好啲。

睇婚紗晚裝記(Part 3)

上星期日去咗Classic試衫，呢度啲衫質素好高，係我想要嗰啲款，但價錢就....
星期一，去Charmant試，sigh...
星期二去埋Peony Bridal試，啲衫都好得，但價錢仲得....
呢幾日不斷諗，究竟租唔租好呢? 諗諗諗諗諗....
終於，有咗個初步的決定，都應該會join Classic...
但，我又約咗呢個星期日去一間叫Wedding Gallery的shop再試，呢度可以任試，價錢仲平成50%....
所以，都係睇吓點先啦....(待續)

陳謝菲小朋友

今日收到個朋友仔電話，談話中提及呢排我好似冇乜update個blog...hehe，因為呢幾日攰啲，又冇乜特別嘢想發表...不過，睇過呢個朋友仔個blog，佢都有放啲童年相，都幾得意吖，所以就等我都介紹一下陳謝菲小朋友啦~~~至於斯莉亞小朋友就要等多一陣至出場.....



今日係陳小朋友生日，祝佢快高長大，學業進步，大個咗記得要聽老婆話呀~~

婚紗 vs 白紗裙

之前成日諗住著婚紗會好鬼誇張，所以一直諗住搵啲白色的晚裝就當係婚紗，但尋日睇esdlife有個姊妹話，婚紗係一生人著一次，而晚裝就好多機會都有得著(如annual dinner, 做姊妹等)，所以點都要揀件正正式式嘅婚紗，同埋著緍紗同啲親戚朋友會有紀念性啲，我覺得佢講得好啱，所以我諗我又轉軚喇，要搵件靚靚婚紗先...當然要維持我的原則，唔可以要爆哂嗰啲款，要搵件簡單高貴的 ^0^

睇婚紗晚裝記(Part 2)

放假嗰幾日，都有去行下金都，原本想睇吓租頭飾的價錢，不過諗起喺expo睇過一間叫Picasso的租衫公司，我睇中咗條紅色晚裝，順道經過咁就上去試試...

上到去試咗1件婚紗2件晚裝，不過不失啦，但就有wow的感覺...之後再去埋SO，嘩，喺嗰度試緊衫的準新娘品味真係好獨特，啲衫似著去化妝舞會多啲，我自問就唔係嗰杯茶，所以試咗啲比較踏實嘅款，但都係唔啱...

下星期約咗另外3間，要make appointment o架，不過價錢就貴啲喇...試咗先算啦!

我的MUA

經過考慮、唔諗又再考慮，終於confirm搵Karen Yiu幫我化妝喇!
我前後試過3個MUAs，第1同第3個就肯定唔會搵，因為佢地一係解決唔到我大細眼的問題，一係就個頭set唔掂，雖然Karen都有唔好的地方，但佢個妝化得幾自然，化完我都敢好近咁望鏡同行出街。同埋佢個profile都好好，咁專業收嘅價錢都好合理，ok啦，費事再俾錢試妝喇....
大家有興趣可以上佢個網睇睇，佢可以幫我做body paint o架....
仲有，佢都係單眼皮，隻眼形都有啲似我，所以我諗佢知可以點整得靚嘅~~~
www.karenyiu.com

玉桃苑

[文章by陳謝菲]

玉桃苑並不是什麼屋苑，它是我們舉行婚宴的地方，但每當跟朋友提起這酒樓，總使人聯想到中國其中一名著 – 玉蒲團。
回想由去年開始籌備結婚時，除擇日外，我們首要工作的就是尋找舉行婚宴的地方，我們差不多走遍港九各家酒樓食市、酒店餐廳。由於今年的酒席十分緊張，找了很久也沒有選好。像樣的食店早已沒有合適的檔期。當走到這家玉桃苑時，感覺也不錯，剛裝修，全場又沒有柱，感覺開揚，所以最終我們選擇了這家位於銅鑼灣時代廣場食通天十二樓的玉桃苑。
朋友們，對不起！你們將不會獲邀到這裡參加我們的婚宴。我們只招待家人親戚！雖然如此，你們還是要給我們人情，因為我們另有安排……