選擇困難症

有日睇電視，劇集中的其中一個主角患咗選擇困難症，我一聽到就即刻同謝菲講，可能我都有呢個症(雖然都唔知係咪有啲咁嘅症)...

早幾日去幫老豆買電話 --
「唔該想睇啲千幾蚊的電話，要nokia..」店員隨後介紹咗兩款。
心想:「兩款都差唔多，買邊部好呢...會唔會有第3款揀呢?」
「有冇推推吓嗰啲款?要nokia」店員再攞3部，但只有一部係nokia。
心想:「都話要買nokia，點解仲要揀?」
「唔該再攞返之前嗰兩部睇睇」其實老豆都話要推推吓嗰啲款。
「都係要呢部，但有冇其他顏色?」店員話只有一個色。
心想:「會唔會第二間有多啲顏色揀?」猶豫5分鐘。
「咁要呢部。」店員攞出新貨。
「咦，點解個盒嗰部係第二個色?」店員解釋佢哋得返一個色。
心想:「不如唔好買住，再睇多幾間。」其實當時已經試緊機。

「有冇ipod?」店員問要那一款。
「ipod nano, 8GB」店員問要乜野色?
「有乜色揀?」店員話銀、黑、藍、綠。其實自己上過網睇....
「你話邊個色靚?」店員話不如過另外一邊睇睇。
「如果係你，你買邊個色?」銀色...但我心唔想。
「較多人買係邊個色?」銀色、黑色。
「唔該攞出嚟睇睇。」睇咗成5分鐘。
「我上網話有紅色o架喎。」我哋間shop冇...但我知只有在網上訂先可以訂到紅色...但都要問。
「咁要黑色。」但又好想要藍色同綠色。

最後成功買咗兩樣嘢，但逗留在店舖的時間係45分鐘。